„Шал“ – вистинско музичко освежување од Нокаут!
Written by Р.Б. on март 10, 2021
Познатиот актер и шоумен Игор Џамбазов, пред околу 2 години, за јавноста откри дека своевремено имал напишано песна со наслов „Шал“, посветена на девојка која била дел од неговиот живот, а за која аранжман направил Никола Перевски-Пере од „Нокаут“…
Можеби помина подолго време, но токму ова музичко парче откинато од непресушната инспирација на Џамбазов и Нокаут, ќе ни ги разубави овие пандемиски денови и ќе ни ги исполни со прекрасни емоции.
Овој пат Игор Џамбазов се потпишува како автор на текстот, музиката и аранжманот се на Роберт Билбилов и Никола Перевски- Пере, а песната е снимена кај Роберт Билбилов во неговата „Just RB Production“.
„Шал“ е вистинско музичко освежување на македонската музичка сцена, а во нејзината изведба учествуваат и Горјан Петровски – гитара, Борче Кузмановски – клавијатура, Виктор Николовски – бас гитара, Благоја Антовски – тапани, Горан Кавраков – саксофон и Миa Перевска – пратечки вокали.
И на крај, за да се биде спакувано како што треба, се снимаше и видео спот чија реализација е на режисерот Јован Куциноски.
