Светот се збогува со Арета Френклин

Арета Френклин, „кралицата на соулот“, која стана првата жена примена во Халата на славните на рокенролот, почина во Детроит на 76-годишна возраст.
На легендарната пејачка во 2010 година ѝ беше дијагностициран рак и минатата година објави дека се повлекува од музиката.

Френклин, чија кариера опфати седум децении, освои 18 награди Греми и е првата жена која беше примена во Рокенрол халата на славните во 1987 година. Таа остави непроценливо наследство зад себе и речиси да нема пејачка која денеска не ја истакна како своја инспирација.

Претседатели, музички легенди, холивудски ѕвезди и други јавни личности ѝ се наклонија на Арета Френклин, кралицата на соул музиката и вистински уникатен вокал.

Последниот настап го имаше минатиот ноември, на гала во Њујорк, одржана во знак на поддршка на фондацијата „Елтон Џон еидс“.

Сер Елтон Џон на Инстаграм напиша: „Загубата на Арета Френклин е удар за сите што ја сакаат вистинската музика. Музика од срцето, душата и црквата. Нејзиниот глас беше уникатен, нејзиното свирење пијано потценето… Ја обожавав неа и му се поклонував на нејзиниот талент. Бог нека ја благослови. Моето сочувство до сите нејзини роднини и пријатели.“

Ени Ленокс рече: „Таа владееше неприкосновено и секогаш ќе биде меѓу највисоките ѕвезди на небото како најистакнатиот вокалист, изведувач и снимател што светот некогаш бил привилегиран да го има.

„Тешко е да се замисли светот без неа. Не само што беше уникатно брилјантна пејачка, туку и нејзината посветеност на борбата за човекови права имаше големо влијание врз светот“, изјави Барбра Стрејсенд.

„Ќе ни недостигаш, кралице“, напиша Опра Винфри на Твитер.