Од Колдплеј до Јо-Јо-Ма: концерти од домашна изолација

Поради пандемијата со коронавирусот, музичките ѕвезди стримуваат концерти во живо – од домашната изолација. Велат, за малку животна радост и забава во време кога речиси секаде животот е ставен на пауза.

Организацијата „Global Citizen“, фокусирана на борба со глобалната сиромаштија, објави серија такви настапи, под насловот „At Home Together (Заедно дома)“. Деновиве, хит е серијата снимки со Крис Мартин, фронтменот на „Колдплеј“, постирани на Инстаграм, на кои тој пее некои од најголемите хитови на групата и им се обраќа на гледачите низ светот, во нивната изолација.

И Џон Леџенд стримуваше концерт во цикусот „Заедно дома“, на кој присуствуваше и неговата сопруга, моделот Криси Тајген.

Пинк ја отпеа песната на Адел „Make You Feel My Love“ во живо на Инстаграм, а Кит Урбан сподели снимка на која свири и пее заедно со својата сопруга Никол Кидман. Многу познати двојки од светот на естрадата и шоу-бизнисот го прифатија овој предизвик за стримнг, дури и дневен, зашто „што друго би правеле“ во ова застанато време.

Челистот Јо-Јо Ма на Твитер постираше видео со Баховата „Сарабанда“, специјално посветено на сите здравствени работници на првите линии на фронтот. „Вашата способност да ја балансирате ќовечката поврзаност и научната вистина во сервис на сите нас – ми дава надеж“, вели познатиот челист во својата објава.

This is for the healthcare workers on the frontlines — the Sarabande from Bach’s Cello Suite No. 3. Your ability to balance human connection and scientific truth in service of us all gives me hope. #songsofcomfort pic.twitter.com/s9e35RW03N

— Yo-Yo Ma (@YoYo_Ma) March 16, 2020

Мајли Сајрус постираше на социјалните мрежи шоу, насловено „Светли мисли: Во живо со Мајли“, кое го објавува секој викенд на Инстаграм. Првата епизода од шоуто беше разговор со психијатар за задржување на позитивниот однос во време на изолацијата.